Liebe Bebbi, muesch uns vergää,
wenn mr ys sälber dien als Sujet nää!
Mir wisse, dass s "aigene Jubyliere"
als Sujet-Waahl nid duet brilliere

Mir gän s zwar zue - in vollem Schtolz:
Fuffzääh Joohr uss speziellem Holz
uff dr Pischte ummerenne,
muess me scho - speziell - doo nenne!
Nur gooht s ys doo bym Juubel-Gedängge
nit wie by de "Gryysel" ums "sälber Weihrauch schwängge", Sondern mir mechte jetzt und doo
uff e grundleegends Gsellschafts-Iibel kho:

 

 

Syt Joohre isch es nämmlig s Laide,
dass dää, wo syt Joohre kha n en Amt beklaide,
s Gfyyhl het, dass me das sell eehre …
(au wenn ain die Aitelkait duet schteere).

"Je suis le soleil!" het e Franzoos mol gruefe
und sich als Sunnekeenyg beruefe ...
E paar Joohr schpeeter het e glaine Keiler
gschraue: "Ich mache Deutschland wieder heiler!"
Druss worde isch e grooss Desaschter
mit Krieg und Folter und andere Laschter.

 

Vo Sottygem dien mir uns dyschtanziere!
Will mir wänn friidlig jubyliere.

Am Aafang koche mr ganz glainy Süppli …
…schtarte als e ganz glai Grüppli,
wo wild und frei und mit vyl Lache
aifach nur wett Fasnacht mache.
Als gaily Sieche mergge mr glyy:
Mir mechte au am Cortège syy!
Und glyy druffaabe - s isch nid glooge -
wird s Wäägeli uff dr Route zooge!

D Sujets sin allewyyl exklusyyv ...
… eher speziell und provokatyyv! …
und mr dien nid in dr Grauzoone warte,
sondern in de Räägeboogefarbe schtarte!

Farbyg froh sell d Fanacht syy!
Fir das schteehn mir Spezielle yy!

 

Syt e paar Joohr hän mr au e Zeedel,
will soone Zeedel macht ys edel.
…und git uns allewyl d Meegligkait,
no klarer z sage, was unser Sujet sait!

… drum daas Joohr zrugg zum ‚Sunne-Keenyg',
wo vo sich sait, är syygy d Kreenyg
vo dr Schepfyg und dr alte Richtyg:
S gäb nur ihn! Und das syg wichtig!

Die Fake-News kenne mr z Basel au,
by dr all-vier-jäährlige Regierygsschau:

Schtatt d Tesla duet die Baschi-Däsche
lieber die aigene Windle wäsche …
S Herzog Evy maint, es syg ebbys Schlächts:
Schwarzy Zaahle syyge farblig z rächts …
Dr Ängelbärger fyyhlt sich nid gsund,
denn trotz Farbloosygkait isch är e ‚bunte Hund'.
Dr Cramer merggt - und das isch nid glooge:
Scho im Kindsgy git s d Farbe vom Räägebooge!
("Myny Farb und Dyny, das git zämme zwai! ...
… und dr Cramer isch ellai!")
Dr Wessels merggt ganz generell:
Ych bau nur Schyssdrägg … aber farblig speziell!
Dr Brutschin maint in dr Wirtschaft numme dääglig:
"Hauptsach farbloos soziaal-verträäglig."
Und d Aggermännyn frogt mit Bedacht:
"Sell y an die spezielly Museumsnacht?"

 

Dr andery Hyschtoorie-Maa,
wo mir am Aafang gnennt hän kha …
Dä het e Schnäuzli und Brillantyyne
und kunnt ys radykaal ‚rächts' yyne!
Dr greeschty Saukaib, wo me jee het gseh ...
… drum kemme mr zem FCB!

 

D Muttenzer-Kurve findet s dr Hit …
… leer an Gaischt, gänn sy s de Schpiiler mit:
Hesch dunggly Hutt und e Fäähler gmacht,
wird ibere "Affekeenyg glacht"!
Bisch "wyss" und bykhunnsch zu Rächt mol "Root",
schreit s Schtadioon "Der Schiri sei tot!"

 

E soone Saich, dien mir Spezielle,
ganz klar und au im Generelle
nid mol aasatzwyys unterschtiitze!
Will mir wänn d Farbygkait als Chance niitze!

Nur dangg däm Grundsatz hän mir Spezielle kenne
15 Joohr lang frisch dur d Fasnacht z renne.

Will mir Spezielle, als schpezielly Gilde,
uns immerwider au dien bilde,
hämmer zämme afoo sueche,
mit wellem gschyyde Buech me kennt d Gschyydhait bueche.

Es "Idiotikon" fallt ys als erschts grad yy!
Das isch sone "on-line-Enzyklopädie".
Die zaigt aim in dyvärse Schparte,
verschiideny Dialäggt und Reedensarte. .

 

 

Do kunnt unter "wildy Dier und Gfoohr"
au d Wildsau - also d "Bache" vor.
Im Dialäggt deeg me scho syt Joohr und Daage
däne wilde Söi au "Moore" saage! !

HALT Bebbi! Soone Wort gooht nimme,
will s noo Rassismusgsetz jo nimm wurd schtimme.
Das Wort derfsch nimm NÄ! GERmanistysch gseh.
Das deeg drum gwisse Schtudänte weh.

Und scho gooht är loos, dr groossy Schtrytt
"Was derf me no und was gooht z wytt?"

 

Griegsch jetzt scho vomene Schtudänt uff d Schnitte,
wenn d bym Begg umme "Schtudänteschnitte" duesch bitte?

Oder: Isch s no erlaubt wenn e dytsche Tourischt,
wo im Glaibasel grad "auf der Pischte ischt",
voll Verziggyg rieft anre bsundre Schtell:
"NEe! GROss isch diese Rheingass! Gell!"

Oder: Schtellsch Dyne Gescht esoone Gmisch
uss Aiwyss und Zugger uff e Disch,
denn gheert ganz gwiss im Mynymum
E Huuch vo Schoggy ussedrum.

Aber schwarz muess sy syy, wenn me die Schoggy serviert! Oder haisst au die jetzt schtargg pygmentiert?.
Uff jeedefall derfsch nimm "Moorekopf" saage,
sunscht haaglets zimmlig sicher Klaage .
"Wildsau-Schädel" (=Moore-Kopf) wär glaub nid verkehrt! Das hämmer am Zeedelaafang glehrt.

 

Laider looht sich s au nid vermyyde, £
dass unsry Regieryg muess drunter lyyde,
wenn sy jeedes Wort wägem "drfir und drgeege"
e jeedes Mol muess uff d Goldwoog leege.

Maint zem Byschpyl dr Erz-Dep-Conradin
"Ich schtand hinter jeedere Lehrerin",
Denn frogt sich Mängge uff dr Ärde,
eb die jetzt sexuell beläschtygt wärde.

 

Wenn dr Brutschin (vom Soziaale und Umwält) duet brichte, Me miess uff Plastygg und Gummy verzichte.
Denn kunnt ganz sicher soone Gloon,
wo schreyt: "Dasch geege d AIDS-Präventioon!"

 

Oder sait dr Baschy zumene Brichterschtatter,
Me fänd als Auti 'TESLA' glatter,
frogt mindeschtens ai so Femynischte-Daame:
"Wurum hän ihry Auty Frauenaame?"

 

Firs Herzog Evi isch s bsunders schlimm,
will dr Schtimmeaadail fir si schtimmt nimm!
Sy het nur aimool gsait: "dr Gwinn syg minimal"
und scho kemme d Gartezwärg nimm zur Wahl!

Au dr Ängelbärger waiss was das haisst!
Är isch drum au scho mol entglaist:
"Mir HAILe anlly! Dr Pryys isch egal!"
Und scho haissts: "Klar rächtsradikaal!"

 

Nur dr Wessels het in so Reedens-Sache
vo allne no am maischte z Lache:
Will egal, was är duet usselooh:
Dä Dialäggt kha kain verschtooh!

Wäg all dääne Frooge, "wie Was sell haisse",
kasch e normaaly Schprooch in Kibel schmaisse!
Will s harzt e jeede Dialoog
und kunnt in e klääbryg-zääche Soog.

 

Drum isch es uns Spezielle wichtig:
Mir gehn in e schpezielly Richtyg
und ässe au das Joohr voller Gnuss
e "Moorekopf"! (kai "Schokokuss"!)

Will mr wänn kai so Schproochekryyse
und leehn ys dr Gnuss au nid vermyyse.
Wenn d au so dänggsch im Generelle,
wird Passyvmoor by de Spezielle!

 

 

Du frogsch dy Bebbi, was mir Spezielle
mit däm schpezielle Sujet welle
Dir vermittle – us beschter Quelle:
Wart s nur ab! Mr dien s verzelle:

Vor Joohre het d Kirche-Obrygkait
de Mensche-Scheefli ganz klar gsait,
wenn me Was im Joohr sell teschte
und wenn me welles Fescht sell feschte:
Per Wind und Wätter und Vollmond-Phaase
hän die klerykaale Naase
entschiide, wenn me Was sell fyyre
und wo me d'Unzucht sell besser schtyyre.

 

 

D'Pfaffe hän däm – iberlait -
aifach „Jahres-Fest-Kreis“ gsait.
Es ganze fooht am erscht Advänt aa...
...goht wytter zem Sanggt Nikolaus, däm guete Maa...
...gipflet s erscht Mool byn ere Geburt im Schtall...
...(Wiehnacht nennt me s iberall!)...
...drnoo 'drey Keenyg'.... denn dr Mittwuch vo dr Äsche...
....doo gryfft me s letschtmool zu dr Fläsche,
byvoor me denn zer Faschtezyt
fascht nur no faschtend ummelyt...
Fasnacht nennt me glaub die Dääg...
...drnoo bisch niechtern und vyl meeh zwääg!...
Denn khasch Dy fraye - und das isch s Grescht -
uff's Oschterhaase-Oschterfescht!

Die Ordnyg isch Gschicht!!! Schprich: S isch vo friehner!
Hitte gseehsch ys als dumpfy Hiehner
in de Lääde ummerenne,
will mir d Joohreszytte nimme kenne!

 

Scho im Auguscht (wenn nid scho im Jänner)
findsch im Konsi Grättymänner.
D Migros liiferet in Extaase
scho im Dezämber Schoggy-Haase.
Dr Aldi-Swiss (und das isch s Schaade),
bringt scho im Novämber Ooschterflaade.
Dr Lidl bringt scho zmittst im Summer
fir s Wiehnachts-Menue Laggs und Hummer.
Und dr Denner maint: „jänu, was wänn dr?...
...Fasnachtskiechli im Adväntskaländer!“

By soomene Puff in de Regaal,
wird dr Joohres-Fescht-Krais doch egal!

 

Schoggy-Haas und s Andere
als PickNick bym Summer-Wandere!
Oschteraier sin hitzuedaag
e Hebschtmäss-Marronny-Aiwyss-Byylaag!
Zmittst im Joohr heb'sch d Änis-Breetli
als „Aufbaunahrung“ in de Pfeetli.
Bruunsli khasch als „Schokohäufchen“ kaufe
Und dr Gneyblätz duet me „Herbst-Fläädchen“ taufe...

Jä gopfridschtutz und nundefaahne,
wo fiehrt dä Waahnsinn au no aane?
...und wär bygott isch an däm tschuld?
...schtoohts in dr regierygsmässyge Huld?

 

Das kennt no syy! Will me muess erkenne,
dass au d Regieryg sich 'drnääbe' muess nenne!

 

Dr Baschi Dürr griegt im groosse Ganze
trotz 'dürr' im Naame schon e Ranze!
D Ackermaa – das gseehsch Du au,
isch kai Maa, sondern e Frau!
Dr Engelberger isch e Bängel
und schwingt schpitalmässyg sy Schwängel!
Dr Wessels isch zwar fir dr Verkehr,
doch schtoppt är lieber dr Verkeehr no meehr!
Dr Cramer wär fir d Schuele doo...
nur was dä kraamt, kha kain verschtooh!
Dr Brutschin wirkt für s Soziaale... - tääglig....
nur isch dä doch soziaal unverträäglig!
Nur s Finanz-Evi Herzog blybt sich treu:
Mir mien allewyl faschte! Trotz Gäld wie Heu!

 

Doch zrugg zum Klaus und Oschterhaas:
s isch an dr Zyt – drum mergged daas:
Es isch an uns, dass die baide Gschtalte
s Lääbe wider normal kenne gschtalte!
Dass sy nimm dääglig frooge mien,
wo Was sy in welles Näscht leege dien.

Es Aifachscht isch – im Generelle:
Fasnacht isch fix!!! Bsunders by de Spezielle!

 

 

Dr Platon, unsre alte Griech,
Philosoph und glatte Siech,
het vor vyylne Joohre gsait:
"S Lääbe isch präggt vo Vergängligkait!"

Är het sich doo - und da'sch nit glooge -
uff "s Lääbe und dr Doot" bezooge.
Syny Wort und sy Verschtand
hän bis hitte no Beschtand!

Mir Spezielle hän dr Platon glääse
und gälte drum als "belääse Wääse",
wo klar dien erkenne und regyschtriere,
wo Doot und Vergängligs duet regiere.

Mänggmool isch s nid grad fir Jeede
erkenntlig... (bisch au nid e Bleede!).
Drum hälfe mir Spezielle noo,
damit d gaischtyg khasch mit ys nooche-kho!

"KO" isch Kirzel vo änglischer Schprooch
und bedyttet: De bisch im Doot ganz nooch!
Mänggmool witt s ys au numme saage,
dass es Verändryge git in de näggschte Daage

 

Als Byschpyl nimmsch doo dr Obama:
Är wird ersetzt dur e trumpelnd Lama.
Dr Morin Guy wird allem aa
ersetzt dur e wyyblige Acker-Maa.
(im Baselbiet sait me däm nur "Buur"
... und ehrlig, sy isch gnau glyych schtuur!)

Dr Saffere-Baizer "Hampe"
muess d Fingge klopfe mit me letschte Gruess...
...Alles isch, wie scho mol gsait,
präggt vo dr Vergängligkait.

Doch s greeschte Byschpyl vom nooche Doot
isch dr FCZ, wo in d Versänggyg goht:
Dä ehemoolyg Fuessball-Club
duet, gschichtlig gseh grad "schwuppdywupp",
schtatt schpiile in de heggschte Lyyge
nur no im Offside Schyttli byyge!....

D Schpiiler dien, schtatt mit goldyge Fingge
nimmy schutte - nur no gingge!
...und begänn sich - trotz de Gfoohre
ins Kampfgetümmel geege Rollatoore!

 

Sy kämpfe frisch und freehlig, schtramm
geege d Geriatryy vom Adulam!
Sy kämpfe - ohny e Leesyg z finde -
erfolgloos geege s "Altershaim drey Linde".
Im Grimpeli geege d Johanytter
kunnt dr FCZett laider au nid wytter.

Verzwyyflet dien denn d Schpiiler schtarte....
geege dr Oberwyyl-Kindergarte.
(S Ergäbnis dert deent zwor scho gschpunne...
aber d Hääfeli-Schuel het 6:2 gwunne!)

Kai Wunder, dass mr drum in dääne Daage
dr FCZett "zu Grabe" traage!
Denn dr FCZett isch, rächt iiberlait
e Byschpyyl vo dr Vergängligkait!

Mir Spezielle mien aber saage,
dass nid nur dr FCZett kha klaage!
Im Geegedail...au unsry Geegend
isch "vergängligkaits"-mässig rächt erreegend:

 

Nimm numme mol dr Eric Wäber dä,
bruun-bleed-schyssyg Sässelklääber:
Dangg Wäähleraatail und no meh,
kasch ihn als e Vergangene gseh!
S Heidi Mück - das isch Vergangeheit,
will sy Antismeytyschs sait.
Dr Embolo goht zu so Niete,
will die Niete vyl meh Batze biete...

Und will me bleeds Gschnur nimmy wett,
verzichtet me uff dr Andrè Auderset....
(wenn'r au mol ebbys sait wo wohr isch....
….s isch vergänglig und drmit hyschtoorisch!)
...und blyyybe mr grad doodrbyy:
Dr Somm schiggt me grad hindedryy!
Will das wo BaZ uns wett verkinde,
kasch soowysoo scho 'geschtert' finde!

 

Wenn d mainsch dr Verglyych mit "Doot und Lääbe"
syg beziglich Ziiry drnääbe,
denn mien mir Spezielle Di beehre
und Di "eines Anderen" belehre:

Me kha zwar Ziiry als Metropoole loobe,
nur Daatsach isch, dert lääbe Schwoobe,
wo schaffe, mache, wirke, schteere,
sodass Ziiry nimm zur Schwyz duet geehre!

Und nimmsch dr FCZett bym Schutte:
Dert schutte nur no fremdy Pflutte....
...es verfählt e jeede Schuss
s Geegner-Gool - drum "Exitus".
Und wider kunnt s Platon-Zytat:
Dr FCZett schtirbt! ...isch das jetzt schaad!

 

Dr FCZett, dä kha sich treschte,
will nääben ihm au all die greeschte
andere Ziiry-Verträtter
(Die Ainte sin bleed, die Andre nätter),
em Untergang entgeegeluege!
Wäg däm kheit d Wät nid uss de Fuege!

Es Albisgietli - nur so zum saage -
isch polytysch in dääne Daage
au nimm was es gsi isch friehner!
S isch zum Träffpunggt worde vo bruune Hiehner,
wo jeede Daag (kasch nyt mache drgeege)
numme bruuny Aier leege!

Was me doo wett uns Schwyzer schängge,
looht uns wider an Platon dängge:
"S Läbe isch präggt vo Vergänglichkeit!
Drum wird au d SVP zu Grabe drait!

Esoo wird dr FCZett - soo unsre Bricht -
zur Symbolfyguur vo dr schwyzer Gschicht:

 

Es duet ganz klar "zum Tode" fiehre,
was Ziiry uns Bebby wett diktiere!
Drum wäg mitem FCZett! ...im Generelle!
Was z Basel gältet, sin die Spezielle!

...und wettsch Du, Bebby uns unterstitze,
wurd Dy Passyv-Bytraag sauvyyl nitze!

 

 

"Du Schatz? Hesch s Portmenee guet verschteggt?
Nit dass es no e Raiber entdeggt!"
Esoo deent s hit in mängger Woohnyg!
Hesch s au scho gheert? - …Oder noonyg?

Klar, wo mr dä Satz regyschtriere mien,
isch maischtens dert, wo sy regiere dien!
Will de Regieryge fäählt persee,
es Gäld in dr Schpaar-Sau als wie meh!

Drum muess me an allnen Egge schpaare
und e ganz e klaare Schpaarkurs faahre!
‚Mir Spezielle' saage - grad wie die Ryyche:
Firs Schpaare geehn mr iber Lyyche!

D Basler Regieryg - so isch z Vernäh,
het e ganz e klaary Erklääryg gäh:
Mir schpaare by allne soziaale Sache,
will die jo numme Keschte mache.

 

Was interessiert dr "army Maa"?
Vyl!!!! Will men an ihm schpaare kha!
Das gschpaarte Gäld schtegge mr denne (s Ganze!)
unsrer Schpaarsau grad in Ranze…
Denn zahle mr mit dääne Finanze
d Neujoohrs-Apero-Musik! …
die bruuchts zum Tanze!

Du mainsch, mir würde ibertryybe?
Bebbi! …Braav am Boode blyybe!
Du glaubsch jo nid, was no wytters lauft!!!
Es Schpaare wird ganz tyyr erkauft!

 

Will z Basel zaahlt e jeede Gsell
bees an s Schpaare! Koschtet s was s well!
Mir selle Dir das doo bewyyse?
OK - Ab in Kampf mit de "Devyyse":

Au wenn dyny Hüftglängg langsam roschte:
S U-Abo wir jetzt vyl meh koschte!
Fahrsch schtatt Auti - zum d Umwält z schoone
- e Roller? Kasch s Portmenee nid schoone:
De zaahlsch! Trotz Schutz vo unsrer Wält!
(Hauptsach Schtutz und noomeh Gäld!)

Hesch Gäld und wottsch e Konto haa,
de griegsch kai Zins! De zaahlsch no draa!
(do dien sich ally ins Füschtli lache,
wo schtatt schpaare Schulde mache!)

Wottsch e guete Schutt-Match gseh?
Denn goht das Gäld nid an FCB!
Es isch au nid d FIFA wo s duet vertüüre!
Es Zauberwort haisst "Billiet"-Schtüüre!

Und aimol meh: S isch zimmlig s Klaare:
Me duet uff unsrem Buggel schpaare!
By all däm Schpaardruck, wo uns duet plooge,
derf me sich doch gar nid frooge,
wurum sich dr Bebbi ganz verschtoohle,
d Grundnaahryg im Ussland gooht go hoole!

(Eb Lörrach oder Weil am Rhein)
Das intressiert am Schluss doch kain! …
Will was me schpaart - es isch zum Gryyne -
Kunnt am Schluss als Schtyyr in "d Schpaarsau" yyne!

Es isch em Basler sy Beschträäbe,
z Basel kenne besser z lääbe.
Zum das au kenne realysiere,
muess me dr Verkehr e bitz reguliere.
Drum het ain vo de Beamte-Affe
e ney verkehrt Regime erschaffe:

Ab soffort isch - und das isch ney -
die ganzy Inneschtadt autifrey.

Zum s Gundeli aimol kenne z umrunde
bruchsch ungefähr so zwai-drei Schtunde
und setsch fir e Sitzyg z Rieche syy,
gisch am Beschte e Wuche Feerie yy.

Fir uns Schugger isch das aber glatt!
Mr gsehn wider vyl meh vo unsrer scheene Schtadt.
Will ab hitte isch s esoo:
Mien mir emoll ane Yysatz go,
denn kenne mr derte aaneschpatziere
und unterwäggs no e biz flaniere!

E Schuggerwaage? Aber nai!
Dä parkiert in Maria-Schtai!
(Das duet sich fir uns Schugger loohne,
will derte het s no wyssy Zoone!)
Doch settys emolle doch passiere,
dass mr setten e weeny bressiere,
denne kenne mr - das isch s Scheene -
d Velo vom Baschi syne Kinder uslehne!

Am Yysatzort aakho, sueche mr denne,
woo mir Schugger hälfe kenne.
Aber: Wie s wägem verkehrt-Regime allewyl goht,
simmer aimol meh halt z schpoot…
Drum gehn mr zrugg, als miedy Pflutte
Und raihen ys yy in d Cortege-Route.

Ains mergsch jetzt - ganz generell
S verkehrt Konzäpt isch sehr speziell!

Dr modärny Mensch het in sym Lääbe
allewyl es glyych Beschträäbe:
S sell alles greeglet syy in Norme,
egaal eb Greessy, Farbe, Forme...
S muess uni-form syy im Groosse-Ganze
und jo nit uss dr Raihe danze!